नेपालको फेसन तथा प्याजेन्ट शोका मञ्चहरूमा निरन्तरता, सृजनशीलता र व्यावसायिकताको सन्तुलित समन्वय प्रस्तुत गर्ने व्यक्तित्वमध्ये रोजिन शाक्य एक प्रमुख नाम हुन्। दुई दशकभन्दा लामो अनुभव, हजारौँ मञ्चीय प्रस्तुति तथा राष्ट्रियदेखि अन्तर्राष्ट्रिय स्तरसम्मको सक्रिय उपस्थितिले उनलाई केवल एक कोरियोग्राफरमा सीमित राखेको छैन; बरु समग्र मञ्चीय कलाको प्रतिनिधि व्यक्तित्वका रूपमा स्थापित गरेको छ।
अन्तर्राष्ट्रिय प्रतिष्ठित संस्था वर्ल्ड बुक अफ रेकर्ड्स लन्डनले नेपालका वरिष्ठ फेसन कोरियोग्राफर रोजिन शाक्यलाई “सर्टिफिकेट अफ एक्सिलेन्स” प्रदान गर्दै सम्मानित गरेको छ। नेपालका फेसन, प्याजेन्ट्री तथा मोडलिङ क्षेत्रमा उनले पुर्याएको उल्लेखनीय योगदानको उच्च मूल्यांकन गर्दै उनलाई यो सम्मान प्रदान गरिएको हो। विशेषतः मञ्चीय अभिव्यक्ति, रनवे कोरियोग्राफी तथा प्रभावकारी प्रस्तुतिको माध्यमबाट “प्रदर्शन” र “प्रस्तुति” बीचको दूरीलाई कुशलतापूर्वक जोड्ने उनको क्षमता—अर्थात् “आर्ट अफ मुभमेन्ट” र “पावर अफ स्पिच” को उत्कृष्ट संयोजन—लाई विशेष प्रशंसा गरिएको छ। उक्त सम्मान सन् २०२६ अप्रिल ३० मा काठमाडौंमा सम्पन्न २०औँ अन्तर्राष्ट्रिय समिट तथा अवार्ड समारोहका अवसरमा प्रदान गरिएको हो, जसले उनको दीर्घ र सफल व्यावसायिक यात्रामा महत्वपूर्ण उपलब्धि थपेको छ।
२४ वर्षअघि उनले च्यानल नेपाल र एनटिभी प्लसबाट कार्यक्रम प्रस्तोता तथा निर्माता रूपमा आफ्नो करियर प्रारम्भ गरेका थिए। पछिल्ला १७ वर्षदेखि उनी इमेज च्यानल टेलिभिजनसँग आबद्ध छन्, जहाँ उनले नेपाल भाषा समाचारका समाचार वाचक तथा संयोजकका रूपमा कार्य गर्दै नेवार समुदायको मातृभाषा नेपाल भाषाको संरक्षण तथा प्रवर्द्धनमा उल्लेखनीय योगदान पुर्याउँदै आएका छन्।
त्यसैगरी, सन् १९९८ देखि उनी स्टेज कार्यक्रम सञ्चालक (एमसी) का रूपमा आफ्नो विशिष्ट पहिचान बनाउँदै आएका छन्। हालसम्म उनले झण्डै १,७०० भन्दा बढी कार्यक्रमहरू सञ्चालन गरिसकेका छन्। ती कार्यक्रमहरूमा फेसन शो, सौन्दर्य प्रतियोगिता, टेलिभिजन रियालिटी शो, टक शो, सांगीतिक तथा सांस्कृतिक कार्यक्रम, अवार्ड समारोह, कर्पोरेट कार्यक्रम, सम्मेलन तथा बाह्य कार्यक्रमहरू समावेश छन्। उनको स्पष्ट अभिव्यक्ति, प्रभावशाली प्रस्तुति शैली तथा आकर्षक मञ्चीय उपस्थितिका कारण उनी नेपालका अग्रणी कार्यक्रम सञ्चालकमध्ये एकका रूपमा परिचित छन्।
शिक्षा तथा व्यावसायिक तालिम क्षेत्रमा पनि उनको योगदान उल्लेखनीय छ। सन् २०१० देखि उनी नमुना कलेज अफ फेसन टेक्नोलोजीसँग आबद्ध रहँदै पर्सनल प्रेजेन्टेशन, फेसन जर्नालिज्म तथा फेसन शो प्रोडक्सन विषय अध्यापन गर्दै आएका छन्। त्यस्तै, उनले इन्टरनेशनल इन्स्टिच्युट अफ फेसन टेक्नोलोजी तथा काठमाडौं एकेडेमी अफ टुरिज्म एण्ड हस्पिटालिटीमा पनि अध्यापन गर्दै आएका छन्।
व्यक्तित्व विकास तथा पेशागत दक्षता अभिवृद्धिमा समेत उनले महत्वपूर्ण भूमिका निर्वाह गरेका छन्। उनी फ्लाइटेक इन्टरनेशनल एयरहोस्टेस ट्रेनिङ एकेडेमी तथा नेपाल एयरहोस्टेस एकेडेमीसँग आबद्ध रहँदै भावी एयरहोस्टेस तथा उड्डयन क्षेत्रका विद्यार्थीहरूलाई सञ्चार कौशल, आत्मविश्वास विकास, पेशागत शिष्टाचार तथा व्यक्तित्व निर्माणसम्बन्धी प्रशिक्षण प्रदान गर्दै आएका छन्।
उनको योगदानलाई विभिन्न राष्ट्रिय तथा अन्तर्राष्ट्रिय पुरस्कारहरूले सम्मान गरेका छन्। सन् २०१८ मा आयोजित इन्टरनेशनल प्रेसटिज ब्रान्ड अवार्डमा उनलाई “बेस्ट इन्टरप्रेन्योर इन मल्टिटास्क पर्सनालिटी अफ द इयर” उपाधि प्रदान गरिएको थियो। सन् २०१९ मा काठमाडौंमा आयोजित प्याजेन्ट नेपाल फेसन एण्ड मोडल अवार्डमा उनलाई “लेजन्डरी फेसन कोरियोग्राफर” को उपाधि प्रदान गरिएको थियो। सोही वर्ष फेसनफेयर अवार्डमा उनी “बेस्ट इन्टरनेशनल नेपाली फेसन कोरियोग्राफर” का रूपमा सम्मानित भए भने मोडल सङ्स अवार्डमा “बेस्ट फेसन कोरियोग्राफर” को उपाधि प्राप्त गरे।
सन् २०२२ मा नेपाल फेसन एण्ड इन्टरटेनमेन्ट अवार्डमा उनलाई “आइकोनिक फेसन कोरियोग्राफर” को उपाधि प्रदान गरियो भने दुबईमा आयोजित एसियन प्रोफेशनल अचिभमेन्ट अवार्डले पनि उनको व्यावसायिक उत्कृष्टतालाई सम्मानित गरेको थियो। सन् २०२३ मा थाइल्यान्डमा आयोजित हेरिटेज इन्टरनेशनल अवार्डमा उनले “कोरियोग्राफर अफ द इयर” को उपाधि प्राप्त गरे।
पत्रकारिता तथा डिजिटल मिडिया क्षेत्रमा पनि उनी सक्रिय छन्। हाल उनी ग्ल्यामर नेपालका एसोसिएट एडिटर तथा येसनेपाली डट कम का प्रमुख सम्पादकका रूपमा कार्यरत छन्, जहाँ उनले नेपाली संस्कृति, कला, उपलब्धि तथा सृजनशील क्षेत्रको प्रवर्द्धनमा निरन्तर योगदान दिँदै आएका छन्।
यसरी वर्ल्ड बुक अफ रेकर्ड्स लन्डनद्वारा प्रदान गरिएको यो सम्मान केवल एक पुरस्कार मात्र नभई सिर्जनशीलता, नेतृत्व, सञ्चार कौशल तथा दीर्घकालीन समर्पणको उच्च सम्मान हो। फेसन, मिडिया, शिक्षा, कार्यक्रम सञ्चालन तथा प्रशिक्षणका माध्यमबाट रोजिन शाक्यले नेपालको फेसन तथा मिडिया क्षेत्रलाई अन्तर्राष्ट्रिय स्तरमा स्थापित गर्न उल्लेखनीय योगदान पुर्याउँदै आएका छन्।
Leave a Reply