“रागा एन्ड चक्र“

पाटन म्युजियममा आई ओपनर मिडिया प्रा.लि द्वारा आयोजित विशेष शास्त्रीय सङ्गीत कार्यक्रम “रागा एन्ड चक्र“ सम्पन्न भयो। कार्यक्रममा सिंगिङ्ग बाउल, इसराज, र तबलाको अद्भुत संयोजनमा शास्त्रीय सङ्गीत प्रस्तुत गरिएको थियो। हिलिंग र ध्यानको माध्यमका लागि प्रयोग हुदैं आएको सिंगिङ्ग बाउललाई शास्त्रीय रागको आधारमा प्रस्तुत गराइएको थियो ।

इसराज वादक सन्तोष भक्त श्रेष्ठ, तबला वादक नवराज गुरुङ, सिंगिङ्ग बाउल थेरापिस्ट अमन साही, र तानपुरामा नूर श्रेष्ठले सामूहिक रूपमा सङ्गीत प्रस्तुत गरेका थिए।

इसराज बादक सन्तोष भक्त श्रेष्ठले कार्यक्रमको बारे भन्दछन्, “ सिंगिङ्ग बाउल र इसराज मार्फत राग प्रस्तुत गरि ध्यानको स्थिति प्राप्त गर्ने र चक्रलाई सकृय पार्ने उदेश्य यस कार्यक्रमको रहेको छ । यो एउटा प्रयोग ,कोशिशका साथै जानकारीको रुपमा पनि बुझिदिन अनुरोध गर्दछु ”।

शास्त्रीय सङ्गीत प्राचीन कालदेखि नै मानिसको मानसिक, शारीरिक, र आध्यात्मिक स्वास्थ्य सुधार गर्न प्रयोग हुँदै आएको छ। यसै क्रममा, कार्यक्रमले मूलाधार चक्र र हृदय चक्रमा आधारित रागहरूको प्रस्तुति दिएर मानिसहरूको ध्यान र आन्तरिक ऊर्जा केन्द्रित गर्ने प्रयास गरेको हो।

कार्यक्रममा शारीरिक स्थिरता र सुरक्षा केन्द्रित मूलाधार चक्रलाई सन्तुलनमा राख्न राग श्याम कल्याण र प्रेम र करुणा केन्द्रित हृदय चक्रलाई सन्तुलनमा राख्न राग दुर्गाको प्रस्तुति दिइयो। यो प्रस्तुति नेपालका संगीत प्रेमीहरू र हिलिंगमा रुचि राख्नेहरूको लागि नयाँ अनुभव प्रदान गर्ने एक महत्त्वपूर्ण कार्यक्रमको रूपमा रहेको थियो।