यस वर्षदेखि प्रदान गरिने गरी ‘शान्तिकिरण–जनमत फरक क्षमता सम्मान’ स्थापना गरिएको छ। समाजसेवी तथा दाता स्वर्गीय शान्तिकिरण जोशीको स्मृतिमा स्थापना गरिएको उक्त सम्मान यस वर्ष त्रिभुवन विश्वविद्यालयका उप–प्राध्यापक डा. गोविन्द आचार्यलाई प्रदान गरिने भएको छ।
जनमत वाङ्मय प्रतिष्ठान नेपालका अध्यक्ष मोहन दुवालका अनुसार ‘शान्तिकिरण जोशी–स्मृति कोष’ मार्फत रु. २५,००० नगदसहित उक्त सम्मान प्रदान गरिनेछ। यसै वर्षदेखि प्रा.डा. प्रकाशराज रेग्मीले स्थापना गर्नुभएको ‘कमलराज–जनमत दर्शन साहित्य सम्मान’ तथा हिरा शर्मा नेपालद्वारा स्थापना गरिएको ‘विश्वशान्ति–जनमत प्रवासी लेखक सम्मान’ पनि प्रदान गरिनेछ, जसमा समान रु. २५,००० नगद राशि रहनेछ।
बनेपाको दुवाल कुलमा गणेशबहादुर र खिलकुमारी दुवालका कान्छी छोरीका रूपमा जन्मिनुभएकी शान्तिकिरण जोशीको यसै वर्ष पुस २७ गते मलेशियाको क्वालालाम्पुरमा ७३ वर्षको उमेरमा हृदयघातका कारण निधन भएको थियो। उहाँले जनमत वाङ्मय प्रतिष्ठान, काभ्रे बहुमुखी क्याम्पस लगायत विभिन्न संस्थामा निरन्तर सहयोग पुर्याउँदै आउनुभएको थियो।
उहाँकै पहलमा वि.सं. २०५३ सालदेखि सञ्चालनमा आएको ‘गणेश/खिलकुमारी दुवाल–जनमत सम्मान’ हालसम्म निरन्तर २९ वर्षदेखि सञ्चालन हुँदै आएको छ।
यही चैत २६ गते बनेपामा आयोजना हुने कार्यक्रममा प्रा.डा. चूडामणि बन्धु, मोहनविक्रम सिंह, प्रा.डा. वीणा पौड्याल, डा. कविता लामा, नन्दकृष्ण जोशी, प्रा.डा. सविना श्रेष्ठ, डा. बलराम अधिकारी, जगदीश ओझा, राजभाई प्रधान र डा. गोविन्दप्रसाद आचार्यसहित १० जनालाई सम्मान गरिने कार्यक्रम तय भएको छ।
Leave a Reply