कान्समा सुनिता डंगोल: नेवारी पहिरनमार्फत नेपाली संस्कृति र सांस्कृतिक कूटनीतिको प्रस्तुति

कान्स फिल्म फेस्टिभलमा काठमाडौं महानगरपालिकाकी कार्यवाहक मेयर सुनिता डंगोल को उपस्थिति नेपाली संस्कृति, फेसन र सांस्कृतिक कूटनीतिको प्रभावशाली प्रस्तुति बनेको छ । परम्परागत नेवारी पहिरनको आधुनिक शैलीमा प्रस्तुत उनको रूपले अन्तर्राष्ट्रिय मञ्चमा नेपालको सांस्कृतिक पहिचानलाई उजागर गर्नुका साथै काठमाडौंको विश्व सिर्जनात्मक समुदायसँगको सम्बन्धलाई पनि थप मजबुत बनाएको देखिन्छ ।

डंगोलले नेवार समुदायको पहिचानसँग गहिरो रूपमा जोडिएको हाकु पटासीको आधुनिक पुनर्व्याख्या गरिएको साडी लगाएकी थिइन् । उनले परम्परागत नेवारी गहना “न्यापु सिखः” समेत धारण गरेकी थिइन् । परम्परागत रूपमा कालो आधार र रातो किनाराले चिनिने हाकु पटासीलाई आधुनिक विश्वमञ्च सुहाउँदो शैलीमा पुनःपरिकल्पना गरिएको थियो ।

यस पोशाकको विशेष आकर्षण ब्लाउज डिजाइन थियो, जसलाई ब्लेजर शैलीमा तयार गरिएको थियो । डिजाइनले परम्परा र आधुनिकताको सन्तुलित संयोजन प्रस्तुत गरेको देखिन्छ ।

विश्वकै प्रतिष्ठित फिल्म महोत्सवमा उनको सहभागिताले काठमाडौंको बढ्दो सांस्कृतिक प्रभाव र नेपालको विकसित हुँदै गएको सिर्जनात्मक पहिचानलाई अन्तर्राष्ट्रिय स्तरमा थप चिनाएको छ ।

कान्सका मेयर डेविड लिस्नार्डको औपचारिक निमन्त्रणामा डंगोल फ्रान्स पुगेकी थिइन् । रेड कार्पेट कार्यक्रममा सहभागी हुनुअघि उनलाई कान्स नगरपालिकाको ऐतिहासिक भवन “होटल डी भिल्ले डी कान्स” मा स्वागत गरिएको थियो । उक्त भेट दुई शहरबीचको सांस्कृतिक सम्बन्धको प्रतीक बनेको थियो, किनकि  युनेक्सको क्रिएटिभ सिटीज् नेटवर्क अन्तर्गत “सिटी अफ फिल्म” का रूपमा विश्वव्यापी मान्यता प्राप्त छन् । काठमाडौाले सन् २०२३ अक्टोबर ३१ मा यो प्रतिष्ठित मान्यता प्राप्त गर्दै नेपालको सांस्कृतिक तथा सिनेमाटिक पहिचानमा महत्वपूर्ण उपलब्धि हासिल गरेको थियो ।

नेपालको सिर्जनात्मक सिनेमाले अन्तर्राष्ट्रिय मञ्चमा थप बलियो उपस्थिति जनाएको छ । यो उपलब्धिले नेपाली चलचित्रकर्मको बढ्दो सम्भावना र विश्वस्तरमा नेपाली कथावस्तुप्रतिको चासोलाई पनि उजागर गरेको छ ।

यस वर्षको कान्स फेस्टिभल नेपालका लागि अझ विशेष बनेको छ, किनकि फेस्टिभलमा प्रदर्शनका लागि अविनाश विक्रम शाहको निर्देशनमा तयार भएको नेपाली छोटो फिल्म इलिफ्यान्ट इन द फग, चयन गरिएको थियो । यसले अन्तर्राष्ट्रिय चलचित्र क्षेत्रमा नेपालको उदीयमान सिर्जनात्मक आवाजलाई थप मजबुत रूपमा प्रस्तुत गरेको छ ।